europa botlhDaq Deutschland tu'lu'
tera'Daq europa SepDaq Deutschland yoS tu'lu'. tera'vaD lenglu'DI' lurDechDajmo', Hatlh DunDajmo' pIj pa' ghIQlu'.
motlh
QubwI' yoS ponglu'bogh yoS luDab chorghmaH cha' 'uy' ghot. Deutsch Hol lujatlh Deutschland nganpu', 'ach pa' Dabmo' Soch vI' wej uy' novpu' Holmey law' lujatlhlu'. cha'vatlh qelIqam juch yoS 'ej vaghvatlh qelIqam 'aD. monDajvaD Berlin ponglu'. tay'qa'ghach 'oS vengvam, qaStaHvIS vaghmaH DIS wavlu'mo' Deutschland yoS. 'a DIS 1990 jar wa'maHDIch jaj wej DDR (Deutsche Demokratische Republik) ghanglu' 'ej Deutschland yoS muvqa'. qaStaHvIS poH veb wa' veng mojchoH cha' Berlin 'ay'mey 'ej wa' yoS mojchoH cha' Deutschland yoS 'ay'mey.
taghDI' tera' DIS 2002 Euro Huch cherlu'. Deutschland yoSDaq, europa SepDaq tay'bogh wa'maH wa' latlh yoSDaq je lo'choHlu'. Dajbej ghu'. euro lo'choHlu'DI' baS nav je Huch lInglu'. DIllu'meH 'ul lo'lu'be'. QIjlu': wa' cigarette ngaSwI' DIlmeH loS euro poQlu'. tera' latlh Huch potlh 'oH Dollar 'e'. tlhoS, wa' Dollar rur wa' euro.
ngoch che'wI' je
democracy 'oH Deutschland yoS ngoch'e'. DaH Deutschland yoS che' Angela Merkel Qang, CDU tay'. qaStaHvIS wa'maH jav DIS che'taH CDU tay'bogh Helmut Kohl. jIbDaj nguvmoHlaw' Schröder Qang 'a chIDlaHbe'ba' ghaH. DIS 2002 wIvqa'lu'. DevwI' potlh je ghaH Joschka Fischer Hur gharwI''e'. HaDtaHvIS DIS javmaH chorgh Daw' tlhej ghaH. qaSDI' gharwI' muvtay, qetmeH waq tuQ Fischer. DIS 1999 New York marathon chav ghaH. federal ngoch 'oHmo' Deutschland yoS, yej qum je ghaj Hoch wa'maH jav yoSHom (bIHvaD Bundesland ponglu'). vaj yoSDaj che'meH ngochDaj lo' Hoch qum. rut HaDmeH yoS Hop qaq law' yoSHom Sum qaq puS 'e' lutu' HaDwI'pu' law'. (Qatlhqu'mo' Deutschland yoS tIng yoS DuSaQmey, HaDmeH pa' ghoSbe' 'ev chan je HaDwI'pu'. ngoDvammo' HaDlu'meH QatHa' yoSHomvam.)
potlh lupwI'
tera' Sepmey pIm law' Deutschland yoSmey pIm nIb. 'evDaq bIQ'a' Hatlh 'IHqu' tu'lu' 'ej tIngDaq HuD tIvlu'. ngoDmeyvammo' yoSDajDaq lengchu' 'e' lutIv Deutschland yoS nganpu'. ngeDqu' lengmey Dat Hemey law'qu' ghajmo' yoS. tIngvo' 'evDaq, 'evvo' chanDaq ngeD lengmeH Qu' 'ej waghbe' lupwI'. baS lupwI' tu'lu', bIQDaq lenglu', muDDaq lenglu', 'ej ghorDaq nIn SIp meQbogh Duj lo' 'e' tIv tera'ngan. 'Itlhqu' Deutschland yoS lengmeH pat, 'ach gho'Do neH lulo'laH. pa' Dabmo' ghot law', rut lenglu'meH cha' baS gho ghajbogh jan Huj lo' Deutschland nganpu'. janmeyvaD lenggho ponglu'.
Duj nongwI'pu' yoS
Deutschland yoSDaq ghorDuj 'oghlu'. ('oHvaD automobil ponglu', vIHwI' 'oS mu'vam 'ej nIn meQ QuQDaj.) Deutschland yoS cham Sov'a' 'oS Dujvam. Deutschland yoSDaq 'op Duj lIngwI' tu'lu'bogh po' law' tera' Duj lIngwI' law' po' puS. Mercedes, Porsche, BMW je lIngmo' chaH, Deutschland 'op Duj Dun law'qu' tera' Duj Dun puS. ngoDvammo' Deutschland yoS HeDaq Do wIvlaH Hoch chIjwI' net Harbej. tera'Daq pIjHa' qaS ghu'vam.
Qujlu' 'e' tIvlu'
Deutschland yoSDaq Huch law' bajlu'. tera'Daq bajwI' nIv chaH Deutschland nganpu''e'. vumtaH neH chaH net Harlaw', 'ach teHbe'. roD football (moQQuj vIpong) 'oH bel potlh'e'. Deutschland yoSDaq, europa SepDaq je lurDech tIQ 'oH Qujvam'e'. 'ach pay' DIS 1954 moQQuj worldcup (moQQuj qaD'a' 'oH, jeS Hoch tera' yoSmey) Qapchu'DI' Deutschland yoS, noyqu'choH Quj. Qapla'vammo' jeQqa' Deutschland yoS. tera' noH'a' cha'DIchmo' jeQbe'lu'. qen qun wanI'vam Delbogh cinema lut waghqu' lInglu'ta'. 'ej DIS 1974, 1990 je Qapqa' chaH. DIS 2006 Deutschland yoSDaq cha'logh tera' qaD'a' cherlu'pu' 'e' lutIvbej nongwI'pu' law'qu'. taghchu'pu' wanI''e' lIjlaHbe'bogh vay' chenmoHmeH Qu'.
loplu' 'e' tIvlu'
reH vumtaH 'ej SaghtaH Deutschland nganpu' 'e' luHar tera'nganpu' law'. 'ach pa' Suchlu'DI' choHbej vay' vuD. vuDlIj DachoHbe'chugh 'ej Deutschland ngan DaqIHchugh vaj Damerlu'bej. tlhoy lop 'ej lopchu' Deutschland ngan law'. rInDI' yaHDaj Qu' roD tachDaq juppu'Daj ghom 'ej wornagh lutlhutlh (rut wornagh 'Iq tlhutlhlu'.) 'ej yIqaw: pIjHa' Sauerkraut Soplu' 'ej Lederhosen tuQlu'. chaq Deutschland yoS tIngDaq lurDech lop loplu'DI' 'oH tuQlu'. lop 'e' tIvmo' Hoch ngan, Deutschland yoSDaq roD Dat loplu'. 'ach Hoch DIS jar cha'DIch qaStaHvIS loS jaj wa' lopno''a' moj yoS 'ay' law'. Düsseldorf, Köln, Mainz je vengDaq karneval botlh'a' tu'lu'. pa' lop 'ej ghom novpu' nuvpu' je. jechlu' 'e' tIvlu'chu'. rut clowns, veqlargh, tlhIngan ghap 'oS jechmey.