DoyIchlan

Deutschland Germany
(joqwI') (Degh)
Hol	German Hol
mon	Berlin
voDleH	Horst Köhler
Qang	Angela Merkel
area	357,050 km²
nganpu'	82,310,000
puHghom	231 ngan ngaS wa' km²
Huch	Euro (1 € = 100 ct)
taghmeH DIS	1949
van bom	Deutschlandlied
poH mI'	UTC +1
Duj Degh	D
Internet-TLD	.de
ghogh HablI' mI'	+49
Europe botlhDaq Germany tu'lu'

tera'Daq Europe SepDaq Germany (German Hol: Deutschland) yoS tu'lu'. tera'vaD lenglu'DI' lurDechDajmo', Hatlh DunDajmo' pIj pa' ghIQlu'.

motlh

QubwI' yoS ponglu'bogh yoS luDab chorghmaH cha' 'uy' ghot. German Hol lujatlh Germany nganpu', 'ach pa' Dabmo' Soch vI' wej uy' novpu' Holmey law' lujatlhlu'. cha'vatlh qelIqam juch yoS 'ej vaghvatlh qelIqam 'aD. monDajvaD Berlin ponglu'. tay'qa'ghach 'oS vengvam, qaStaHvIS vaghmaH DIS wavlu'mo' Germany yoS. 'a DIS 1990 jar wa'maHDIch jaj wej GDR (German Democratic Republic) ghanglu' 'ej Germany yoS muvqa'. qaStaHvIS poH veb wa' veng mojchoH cha' Berlin 'ay'mey 'ej wa' yoS mojchoH cha' Germany yoS 'ay'mey.

taghDI' tera' DIS 2002 euro Huch cherlu'. Germany yoSDaq, Europe SepDaq tay'bogh wa'maH wa' latlh yoSDaq je lo'choHlu'. Dajbej ghu'. Euro lo'choHlu'DI' baS nav je Huch lInglu'. DIllu'meH 'ul lo'lu'be'. QIjlu': wa' cigarette ngaSwI' DIlmeH loS euro poQlu'. tera' latlh Huch potlh 'oH dollar 'e'. tlhoS, wa' dollar rur wa' euro.

ghoch che'wI' je

Democracy 'oH Germany yoS ngoch'e'. DaH Germany yoS che' Angela Merkel Qang, CDU tay'. qaStaHvIS wa'maH jav DIS che'taH CDU tay'bogh Helmut Kohl. jIbDaj nguvmoHlaw' Gerhard Schröder Qang 'a chIDlaHbe'ba' ghaH. DIS 2002 wIvqa'lu'. DevwI' potlh je ghaH Joschka Fischer Hur gharwI''e'. HaDtaHvIS DIS javmaH chorgh Daw' tlhej ghaH. qaSDI' gharwI' muvtay, qetmeH waq tuQ Fischer. DIS 1999 New York marathon chav ghaH. federal ngoch 'oHmo' Germany yoS, yej qum je ghaj Hoch wa'maH jav yoSHom (bIHvaD Bundesland ponglu'). vaj yoSDaj che'meH ngochDaj lo' Hoch qum. rut HaDmeH yoS Hop qaq law' yoSHom Sum qaq puS 'e' lutu' HaDwI'pu' law'. (Qatlhqu'mo' Germany yoS tIng yoS DuSaQmey, HaDmeH pa' ghoSbe' 'ev chan je HaDwI'pu'. ngoDvammo' HaDlu'meH QatHa' yoSHomvam.)

potlh lupwI'

tera' Sepmey pIm law' Germany yoSmey pIm nIb. 'evDaq bIQ'a' Hatlh 'IHqu' tu'lu' 'ej tIngDaq HuD tIvlu'. ngoDmeyvammo' yoSDajDaq lengchu' 'e' lutIv Germany yoS nganpu'. ngeDqu' lengmey Dat Hemey law'qu' ghajmo' yoS. tIngvo' 'evDaq, 'evvo' chanDaq ngeD lengmeH Qu' 'ej waghbe' lupwI'. baS lupwI' tu'lu', bIQDaq lenglu', muDDaq lenglu', 'ej ghorDaq nIn SIp meQbogh Duj lo' 'e' tIv tera'ngan. 'Itlhqu' Germany yoS lengmeH pat, 'ach gho'Do neH lulo'laH. pa' Dabmo' ghot law', rut lenglu'meH cha' baS gho ghajbogh jan Huj lo' Germany nganpu'. janmeyvaD lenggho ponglu'.

Duj nongwI'pu' yoS

Germany yoSDaq ghorDuj 'oghlu'. ('oHvaD automobile ponglu', vIHwI' 'oS mu'vam 'ej nIn meQ QuQDaj.) Germany yoS cham Sov'a' 'oS Dujvam. Germany yoSDaq 'op Duj lIngwI' tu'lu'bogh po' law' tera' Duj lIngwI' law' po' puS. Mercedes, Porsche, BMW je lIngmo' chaH, Germany 'op Duj Dun law'qu' tera' Duj Dun puS. ngoDvammo' Germany yoS HeDaq Do wIvlaH Hoch chIjwI' net Harbej. tera'Daq pIjHa' qaS ghu'vam.

Qujlu' 'e' tIvlu'

Germany yoSDaq Huch law' bajlu'. tera'Daq bajwI' nIv chaH Germany nganpu''e'. vumtaH neH chaH net Harlaw', 'ach teHbe'. roD football (moQQuj vIpong) 'oH bel potlh'e'. Germany yoSDaq, Europe SepDaq je lurDech tIQ 'oH Qujvam'e'. 'ach pay' DIS 1954 moQQuj worldcup (moQQuj qaD'a' 'oH, jeS Hoch tera' yoSmey) Qapchu'DI' Germany yoS, noyqu'choH Quj. Qapla'vammo' jeQqa' Germany yoS. tera' noH'a' cha'DIchmo' jeQbe'lu'. qen qun wanI'vam Delbogh cinema lut waghqu' lInglu'ta'. 'ej DIS 1974, 1990 je Qapqa' chaH. DIS 2006 Germany yoSDaq cha'logh tera' qaD'a' cherlu'pu' 'e' lutIvbej nongwI'pu' law'qu'. taghchu'pu' wanI''e' lIjlaHbe'bogh vay' chenmoHmeH Qu'.

loplu' 'e' tIvlu'

reH vumtaH 'ej SaghtaH Germany nganpu' 'e' luHar tera'nganpu' law'. 'ach pa' Suchlu'DI' choHbej vay' vuD. vuDlIj DachoHbe'chugh 'ej Germany ngan DaqIHchugh vaj Damerlu'bej. tlhoy lop 'ej lopchu' Germany ngan law'. rInDI' yaHDaj Qu' roD tachDaq juppu'Daj ghom 'ej wornagh lutlhutlh (rut wornagh 'Iq tlhutlhlu'.) 'ej yIqaw: pIjHa' Sauerkraut Soplu' 'ej Lederhosen tuQlu'. chaq Germany yoS tIngDaq lurDech lop loplu'DI' 'oH tuQlu'. lop 'e' tIvmo' Hoch ngan, Germany yoSDaq roD Dat loplu'. 'ach Hoch DIS jar cha'DIch qaStaHvIS loS jaj wa' lopno''a' moj yoS 'ay' law'. Düsseldorf, Cologne, Mainz je vengDaq Karneval botlh'a' tu'lu'. pa' lop 'ej ghom novpu' nuvpu' je. jechlu' 'e' tIvlu'chu'. rut clownpu', veqlargh, tlhIngan ghap 'oS jechmey.

yoSHommey

Germany wa'maH jav yoSHommey (Bundeslandmeyqoq) monmeychaj je 'aghtaH tetlhvam. veng'a'mey bIHmo' je, mon lughajbe' wej yoSmoHmey.

• Baden-Württemberg, mon: Stuttgart
• Bavaria ("Bayern"), mon: Munich ("München")
• Berlin
• Brandenburg, mon: Potsdam
• Bremen
• Hamburg
• Hesse ("Hessen"), mon: Wiesbaden
• Mecklenburg-Western Pomerania ("Mecklenburg-Vorpommern"), mon: Schwerin
• Lower Saxony ("Niedersachsen"), mon: Hanover ("Hannover")
• North Rhine-Westphalia ("Nordrhein-Westphalen"), mon: Düsseldorf
• Rhineland-Palatinate ("Rheinland-Pfalz"), mon: Mainz
• Saarland, mon: Saarbrücken
• Saxony ("Sachsen"), mon: Dresden
• Saxony-Anhalt ("Sachsen-Anhalt"), mon: Magdeburg
• Schleswig-Hostein, mon: Kiel
• Thuringia ("Thüringen"), mon: Erfurt